تاجیکستان نگران نفوذ داعش از مرزهای افغانستان است

رئیس جمهوری تاجیکستان نگران حضور نیروهای داعش در مرزهای کشورش است. در حمله به مرزبانان تاجیکستان اخیرا یک فرمانده قوای مرزی تاجیک کشته شد. به دنبال این درگیری تاجیکستان مرزهای خود را پنج روز به روی افغانستان بست.

87 نمایش هاکوکچه پرسآخرین بروزرسانی:یکشنبه ۳ جدی ۱۳۹۶ - ۵:۵۲ بعد از ظهر
تاجیکستان نگران نفوذ داعش از مرزهای افغانستان است

مقامات امنیتی روسیه هم درباره حضور داعش در مرزهای تاجیکستان هشدار می‌دهند. الکساندر بورتینکوف، رئیس سرویس امنیت فدرال روسیه (اف ‌اس ‌بی) می‌گوید، افراد وابسته به گروه داعش پس از شکست در عراق و سوریه به صورت گروهی در حال اعزام به افغانستان هستند تا از آنجا به کشورهای آسیای مرکزی نفوذ کنند.

اسپوتنیک، خبرگزاری روسی روز شنبه ۲۳ دسمبر از قول کابلوف، نماینده ویژه روسیه در امور افغانستان گزارش داد، اعضای داعش که از سوریه و عراق به افغانستان آمده‌اند، در شمال این کشور از جمله در جوزجان و سرپل در ولایت‌های هم مرز با تاجیکستان و ترکمنستان مستقر شده‌اند. کابلوف تعداد اعضای گروه داعش در افغانستان را بیش از ۱۰ هزار نفر اعلام کرده است.

مرز طولانی تاجیکستان با افغانستان

امامعلی رحمان، رئیس جمهوری تاجیکستان هم در سخنرانی اش به روز جمعه در پارلمان کشورش گفت که پیدا شدن گروه‌های وابسته به “دولت اسلامی” یا داعش در افغانستان و پیوستن اتباع کشورهای همسود به این گروه‌ها، موجب نگرانی کشورهای آسیای‌میانه است. رحمان تاکید کرد که تاجیکستان با افغانستان مرز طولانی دارد و به این مسئله نمی‌تواند بی‌تفاوت باشد.

نگرانی رئیس جمهوری تاجیکستان بی‌دلیل هم نیست، زیرا این کشور حدود ۱۳۰۰ کیلومتر با افغانستان مرز مشترک دارد و این مرز به عنوان مسیر انتقال مواد مخدر از افغانستان به روسیه و غرب و همچنین جنگجویان افراطی شناخته می‌شود. مرزهای تاجیکستان با افغانستان کوهستانی و صعب العبور هستند و کنترل آن دشوار است.

تاجیکستان مرز اش را به روی افغانستان بسته است

ولایت های بدخشان، تخار و قندوز در شمال افغانستان با تاجیکستان مرز مشترک دارند. اخیرا در درگیری مرزی در مرز تاجیکستان با افغانستان فرمانده یک واحد مرزبانی کشته و چهار مرزبان تاجیک زخمی شدند.

مقامات تاجیک از افغانستان خواسته‌اند که موضوع کشته شدن فرمانده تاجیک را پیگیری و عاملین را دستگیر کنند. به دنبال این حادثه تاجیکستان مرزهای خود را به روی افغانستان بست و بعد از پنج روز مسدود بودن، دوباره بازگشایی کرد. مقام‌های افغان گفتند گذرگاه‌های مرزی در ولایت‌های تخار و قندوز روز جمعه ۲۲ دسمبر دوباره باز شده‌اند

۱۳۹۶-۱۰-۰۳ ۱۳۹۶-۱۰-۰۳
کوکچه پرس