جهانخبر و گزارشدیپلماسی

رهبران پاکستان و تاجیکستان در مورد افغانستان گفتگو کردند

عمران خان؛ نخست‌وزیر پاکستان با امام‌علی رحمان؛ رییس جمهوری تاجیکستان به صورت تلفونی در مورد افغانستان گفتگو کرده‌است.

آقای خان در این گفتگوی تلفونی با امام‌علی رحمان؛ رییس جمهوری تاجیکستان، بر نقش مهم جامعه بین‌المللی در ارائه کمک‌های بشردوستانه لازم به افغانستان برای کاهش رنج مردم عادی تاکید ورزیده‌است.

نخست‌وزیر پاکستان با رحمان توافق کرده که به منظور هماهنگی بیش‌تر تلاش‌های خود در حمایت از صلح و ثبات در افغانستان در تماس نزدیک باشند.

خان پیش‌تر گفته‌بود که با رییس جمهوری تاجیکستان در مورد مشارکت اقوام از جمله تاجیک‌ها در دولت طالبان رایزنی می‌کند.

از جانب دیگر اخیرا تنش میان طالبان و تاجیکستان افزایش یافته‌است.

طالبان تاکید امام‌علی رحمان بر تشکیل دولت فراگیر در افغانستان مداخله می‌دانند.

ملا عبدالغنی برادر؛ معاون اول رییس دولت طالبان گفته‌است، تاجیکستان در امور داخلی افغانستان مداخله می‌کند. او هشدار داده که هر اقدامی واکنش نیز خواهد داشت.

ملا برادر می‌گوید که طالبان به کشورهای همسایه اجازه نخواهد داد که درگیری فرقه‌ای و قومی را به راه‌اندازد.

از سویی هم به نظر می‌رسد روابط طالبان و تاجیکستان بر سر جبهه ملی مقاومت به رهبری احمد مسعود؛ پسر احمد شاه مسعود نیز تیره شده‌است.

اخیرا برخی رسانه‌ها گزارش دادند که تاجیکستان به پایگاه جبهه مقاومت ضد طالبان تبدیل شده‌است.

گفتنی است که تاجیکستان پس از سقوط دولت به دست طالبان، تحرکات نظامی خود در مرز افغانستان را بخاطر تهدیدات داعش گسترش داده‌است.

دیدگاهتان را بنویسید

نشانی ایمیل شما منتشر نخواهد شد.

دکمه بازگشت به بالا