نشست امنیتی هرات در پایتخت تاجیکستان آغاز به کار کرد

این نشست امروز، سه‌شنبه، ۸ قوس، در سالون کنفرانس‌های کتابخانه ملی تاجیکستان آغاز شده است.

در این نشست که برای دو روز ادامه خواهد داشت، نزدیک به ۲۰۰ تن از کشورهای مختلف اشتراک دارند.

این نشست با محوریت «نظام سیاسی فراگیر؛ الگوها و نقشه راه» در حال برگزاری است.

یکی از مقام‌های تاجیکستان در سخنرانی افتتاحیه نشست امنیتی هرات گفت که میزبانی آنان از نشست امنیتی هرات و برگزاری آن در کتابخانه مرکزی تاجیکستان نشانه سیاست صلح‌جویانه این کشور در رابطه به افغانستان است.

به گفته او سیاست تاجیکستان حمایت از ایجاد یک حکومت همه‌شمول در افغانستان است؛ زیرا ایجاد حکومت همه‌شمول می‌تواند منجر به پایان منازعه نیم قرنه افغانستان و دستیابی به عدالت اجتماعی شود.

وی افزوده است که این نشست یک نشست کارشناسی است و علیه هیچ نظام و کشور و یا سیاستی نیست، بلکه بستری برای گفت‌وگوی متنوع در رابطه به مسایل افغانستان است.

در مراسم افتتاحیه این نشست نخست مقام‌های تاجیکستان و سپس رنگین دادفر اسپنتا، رییس هیأت مشورتی انستیتوت مطالعات استراتژیک افغانستان، سخنرانی خواهند کرد.

دهمین نشست امنیتی هرات در حالی در تاجیکستان آغاز می‌شود که این نشست همه ساله با میزبانی افغانستان برگزار می‌شد.