مقام‌های چین و اوزبیکستان بر لزوم ادامه هماهنگی برای بهبود اوضاع جاری در افغانستان تاکید کرده‌اند.
ای‌کی‌آی پرس، از رسانه‌های اوزبیکستان، روز چهارشنبه، ۲۳ حمل، از دیدار شوکت میرضیایوف، رییس جمهور این کشور با چین گانگ، وزیر امور خارجه چین، در تاشکند خبر داده است.
براساس اطلاعات نشر شده، رییس جمهور اوزبیکستان و وزیر امور خارجه چین در این دیدار بر ارایه کمک‌های عملی به توسعه اقتصادی – اجتماعی افغانستان تاکید کرده‌اند.
وزیر امور خارجه چین برای اشتراک در چهارمین نشست وزیران خارجه کشورهای همسایه افغانستان در اوزبیکستان به‌سر میبرد.
در این دیدار، دو طرف تعمیق هرچه بیشتر مشارکت استراتژیک و تقویت همکاری‌های دوجانبه میان اوزبیکستان و چین را نیز به بررسی گرفته‌اند.
چین و اوزبیکستان پس از تسلط طالبان بر افغانستان، روابط پرتعاملی با این گروه داشته‌اند.
