سفیر افغانستان در دوشنبه گفته است که در سرکونسل‌گری کشور در خاروغ تاجیکستان هیچ نوع تغییر رسمی نیامده است و موقف تاجیکستان در قبال طالبان نیز واضح است.
ظاهر اغبر، سفیر افغانستان در تاجیکستان، روز شنبه، ۵ حمل، با نشر پیامی در برگه فیس‌بوکش نگاشته است که سفارت افغانستان مقیم تاجیکستان به فعالیت‌های سیاسی خود به‌طور معمول ادامه می‌دهد و «خانه عدالت‌خواهی و آزادی‌خواهی» مردم افغانستان است.
این گفته‌های آقای اغبر در حالی بیان می‌شود که وزارت امور خارجه طالبان امروز اعلام کرد که هیأتی از این وزارت از کنسول‌گری افغانستان در خاروغ، مرکز ولایت بدخشان تاجیکستان، دیدن کرده است.
از جانبی، منابع امروز (شنبه، ۵ حمل) می‌گویند که این هیأت هفته گذشته به هدف گفت‌‌وگو درباره واگذاری کنسول‌گری افغانستان در خاروغ به طالبان عازم تاجیکستان شده بود.
